संविधानको रक्षा गर्दै देशमा दिगो शान्ति, सुशासन, विकास र समृद्धिसम्म पुग्ने विषयमा स्पष्ट र एकताबद्ध भएको भन्दै नौ दलले संयुक्त रूपमा विज्ञप्ति जारी गरेका हुन्।
विज्ञप्तिमा भनिएको छ, ‘नेपालको संविधानको सार्थक कार्यान्वयनका क्रममा मूलुक तेस्रो राष्ट्रपति निर्वाचनको पूर्व सन्ध्यामा छ। संविधानको रक्षा गर्दै देशमा दिगो शान्ति, सुशासन, विकास र समृद्धिसम्म पुग्ने विषयमा हामी स्पष्ट र एकताबद्ध छौं।
केही दिनयता जनताको त्याग र बलिदानबाट प्राप्त संविधान र लोकतान्त्रिक गणतन्त्रको मर्म एवम् भावना विपरीत भइरहेका केही क्रियाकलापतर्फ हाम्रो ध्यान गम्भीर रूपले आकृष्ट भएको छ। संविधानले नचिनेका नदेखेका तथाकथित पदका नाममा गरिने संविधान विपरीतका गतिविधि र तिनलाई सहयोग गर्ने क्रियाकलापहरु लोकतन्त्र विरोधी अवान्छित हुन भन्ने विषयमा हामी एकमत छौं। संविधान र लोकतान्त्रिक गणतन्त्रको रक्षाका लागि एकजुट भई अगाडि बढ्ने दृढता व्यक्त गर्छौं।’
‘केही समययता संक्रमणकालीन न्यायबारे उठेका विषयमा हाम्रो ध्यान गम्भीर रूपले आकृष्ट भएको छ। शान्ति प्रक्रियाका बाँकी कामलाई विस्तृत शान्ति सम्झौता र संविधानको भावना अनुरूप तार्किक निष्कर्षमा पुऱ्याउन हामी प्रतिबद्ध छौं। विगतमा सम्बन्धित विषयमा कानुन निर्माण र आयोग गठन गरी केही काम सम्पन्न भएको सर्वविदितै छ। यसबारे बाँकी कामहरू अविलम्व पूरा गरिनेछन्,’ विज्ञप्तिमा थप भनिएको छ।
द्वन्द्वकालीन घटनाबाट पीडित नागरिक एवम् उसका परिवारलाई न्याय दिन आवश्यक विधेयक सर्वोच्च अदातलको फैसला बमोजिम कानुन बन्ने गरी संसदको यसै अधिवेशनमा प्रस्तुत गरिने पनि विज्ञप्तिमा उल्लेख छ।
त्यस्तै कानुन निर्माणका साथै सत्य निरूपण तथा मेलमिलाप आयोग र बेपत्ता पारिएका व्यक्तिको छानबिन सम्बन्धी आयोग गठन गरिने पनि उल्लेख छ।
‘मुलुककै महत्वपूर्ण एजेन्डाका रूपमा रहेको हामी सबैको साझा विषयलाई उचित निष्कर्षमा पुऱ्याउन सबैको सकारात्मक भूमिका र सहयोगको अपेक्षा गर्छौं,’ नौ दलद्वारा जारी विज्ञप्तिमा भनिएको छ।
आइतबारै प्रधानमन्त्रीको सरकारी निवास बालुवाटारमा आठ दलको बैठक बसेको छ। बैठकमा प्रधानमन्त्री प्रचण्ड, कांग्रेस सभापति देउवा, नेकपा एकीकृत समाजवादीका महासचिव बेदुराम भुसाल, जनमत पार्टीका उपाध्यक्ष खान, लोसपा अध्यक्ष ठाकुर, नेपाल समाजवादी पार्टीका अध्यक्ष भट्टराई, राष्ट्रिय जनमोर्चा अध्यक्ष केसी, जसपा नेता राजेन्द्र श्रेष्ठ लगायत थिए।
प्रधानमन्त्री सचिवालयका अनुसार ८ दलबीच समसामयिक राजनीतिक र राष्ट्रपति निर्वाचन लगायत विषयमा कुराकानी भएको छ। यही फागुन २५ गते राष्ट्रपति निर्वाचनका लागि मतदान हुँदैछ
नेपाली
पालुङटार न्यूज 
खुसी
दुःखी
अचम्मित
उत्साहित
आक्रोशित
प्रतिक्रिया दिनुहोस्